Partizani pa shumë vuajtje në një ndeshje të cilën e kontrolloi thuajse në çdo minutë të saj, ia doli të mposhtë me shifrat 2-0 Orikun dhe të kalojë në turin e dytë të Kupës së Shqipërisë.
Në prononcimin e dhënë për “Panorama Sport” pas ndeshjes, trajneri i të kuqve, Xhovani Kolela, pohoi se nuk ka pasur asnjë merak për këtë sfidë, duke marrë parasysh barazimin në ndeshjen e kaluar, rezultat që nuk ofronte garanci.
NDESHJA – Ai gjithashtu ka mbetur i kënaqur nga lojtarët që nuk kanë pasur shumë minuta.
“Nga anët e mia thonë që nuk mund të fitosh gjithnjë. Në ndeshjen e parë ishin ata që bënë mirë dhe në ndeshjen e dytë bëmë më mirë ne. Ndaj, nuk kisha ndonjë merak për shkak të rezultatit në përballjen e kaluar. Sa i përket lojtarëve që aktivizova, të cilët nuk kanë pasur shumë minuta, jam i kënaqur me paraqitjen e tyre dhe sidomos me impenjimin në këtë sfidë”, u shpreh fillimisht italiani i të kuqve.
KASTRIOTI – Më tej, në lidhje me ndeshjen e kampionatit ndaj Kastriotit të dielën po në Elbasan në orën 17:45, trajneri italian pohoi se do të fillojnë të mendojnë nga dita e sotme.
“Nga nesër (sot) do të mendojmë për ta (Kastriotin). Mbyllëm ndeshjen e Kupës fillimisht dhe më pas do të mendojmë për Kastriotin”, pohoi ai. Sa i përket presionit për vendin e parë ai e kaloi me një batutë, duke e kaluar atë te ndjekësit.
“Nga ne ishte një tip që quhej Andreoti dhe thoshte gjithnjë se presionin e kanë ata që ndjekin dhe jo ato që janë para. Ne jemi të qetë, thjesht bëjmë ndeshjet tona dhe kaq”, përfundoi prononcimin e tij për gazetën Xhovani Kolela.
Discussion about this post