Dalja e lumit Vjosa nga shtrati shkaktoi përmbytje të mëdha në disa fshatra të Fierit duke bërë që banorët të dilnin nga shtëpitë dhe të strehoheshin diku tjetër.
Banorët e fshatit Ferras në Fier, shprehen se ndihen të zhgënjyer nga qeveria, pasi ende nuk kanë marrë dëmshpërblimin e banesave në 2015, ndonëse iu është premtuar dhe kanë letrat nga bashkia, ndërsa shtojnë se janë në gjendje katastrofe.
“Jam Qemal Alia nga fshati Ferras, në 2015 më ka rënë banesa nga lumi, i kam letrat dhe deri sot nuk më ka dhënë shpërblim shteti, lumi erdhi sërish dhe më bëri dëme të mëdha se më ikën të gjitha orenditë. Erdhën bënë kanalin e lanë përgjysmë, dhe shkatërroi banesat. Jemi në gjendje katastrofe, jam plak i vetëm me plakën dhe kemi ndenjur në soletë mbrëmë fjetëm lart. Ka shtet apo jo, na mbyti kanali i Matinës se e bënë dhe na lanë përgjysmë, ja ku janë letrat për të kthyer lekët dhe deri sot asnjë qindarkë”, tha banori.
Një tjetër nga banorët u shpreh se pushteti lokal dhe vendor vazhdon të tallet me ta dhe ende nuk kanë marrë dëmshpërblimet e merituara, ku dhe bëjnë thirrje të ndërhyhet në raste të një tjetër katastrofe.
“Kemi kaluar një katastrofë që nuk dinim nga të shkonim, po të kishte mbajtur dhe një gjysmë ore ne do ishim përmbytur si në 2015. Na u premtua në 2015 se do na jepnin dëmshpërblimin por na tallën. Shkuam për herë të dytë dhe na tallën dy herë, si i bëhet kjo punë. Na premtoi vetë Rama që do iu jap, doli dhe ky Subashi dhe na tallën. Tani ne kemi dhe kanalin kryesor që e lanë përgjysmë, këtë vit tha do e bëjnë po na tallën. Kemi ngelur vetëm ne pleqtë këtu”, tha njëri nga banorët.
Discussion about this post