Babai i 26-vjeçarit, Arben Mici që humbi jetën tragjikisht në komisariatin e Kamzës pasi flakët pushtuan qelinë ku po qëndronte, ka folur për mediat pas ngjarjes së rëndë.
Në një intervistë ekskluzive për ABC, babai dhe daja i viktimës shprehen të tronditur për ngjarjen e rëndë. “Sot do i çoja rrobat, vetëm kur erdhën policët dhe më dhanë lajmin”, tha babai i të riut.
Ata kanë deklaruar se e kanë çuar 26-vjeçarin në polici që ai të shtrohet në spital që të marrë ndihmë dhe jo për t’i marrë jetën. Ngjarja e rëndë ndodhi mbrëmjen e djeshme, ku dyshohet se i riu dhe i ndaluari Dilaver Idrizi, jashtë rrezikut për jetën, i kanë vënë zjarrin qelisë ku po qëndronin për tu arratisur, por gjërat i shkuan huq.
Sakaq, një tjetër version i mundshëm është se dy të ndaluarit kishin dalë ditën e djeshme përpara Gjykatës, ku iu ishte komunikuar masa e arrestit me burg dhe si pasojë e dënimit njëri prej tyre kishte kaluar në gjendje të rëndë psikologjike dhe dogji vetën, në atë moment flakë janë përhapur në të gjitha ambientet e komisariatit.
Dy inspektorë policie janë vënë në pranga, dhe 3 të tjerë janë proceduar penalisht, për ngjarjen e rëndë pasi kanë lejuar lëndë ndezëse në qelinë ku po mbaheshin dy të paraburgosurit Dilaver Idrizi dhe Arben Mici. Ky i fundit humbi jetën si pasojë e zjarrit, ndërkohë që lëndime mori dhe Idrizi si dhe një inspektor policie, i cili ishte në detyrë në momentin e përhapjes së flakëve.
Discussion about this post