Zjarri që ka përfshirë sot fshatin Shtyllas në Fier ka revoltuar jo pak banorëve, për dëmin e tokave e më shumë se 50 fermerëve. Secili prej tyre numëron më shumë se 100 rrënjë ullinj të mbjella në zonat e përfshira nga flakët.
Banorët e zonës shprehen të revoltuar se zjarri ka ardhur nga Levani dhe kanë dyshime se ka qenë i qëllimshëm nga barinjtë që kullosin bagëtitë në këto zona. Ndërsa terreni i vështirë kanë penguar edhe forcat zjarrfikëse për të ndërhyrë në kohë. Kanë qenë vetë banorët që kanë mbajtur nën kontroll flakët, por dëmet që kanë lënë pas ato janë të mëdha.
Një prej tyre tregon se në zonën e përfshirë nga flakët ndodhen edhe varrezat e fshatit.
“Si ra zjarri po t’i digjet ajo kavoletë i bie ta blejë me 7 mijë lekë dëngu. Ose do shesë lopët dhe të lërë kalamajt pa bukë. Zjarri është i qëllimshëm. Korrent nuk ka, gjë nuk ka.
Ose ka vajtur ndonjëri për të pastruar ullinjtë dhe bëri hatanë këtu. Me varreza me të gjitha. Edhe të vdekurit nuk kanë derman këtu. Turpi zotit. Ja ky është shteti jonë”, shprehet banori.
