Flavio Saraçi, 19 vjeçari shqiptar, gjendet i pajetë në Itali : Dyshime për…

Një ngjarje e rëndë ka tronditur komunitetin shqiptar dhe banorët e Masotti-t në Serravalle Pistoiese, provincë e Pistoias, Itali.

Mbrëmjen e së premtes, më 24 tetor, Flavio Saraçi, një 19-vjeçar shqiptar, u gjet i pajetë në dhomën e tij nga vëllai i vogël. Vdekja e tij e papritur dhe e pashpjegueshme ka lënë familjen dhe miqtë në pikëllim të thellë.

Rreth orës 18:00, vëllai i Flavios hyri në dhomën e gjumit dhe e gjeti të rrëzuar dhe pa shenja jete. Shërbimet e urgjencës mbërritën menjëherë dhe e transportuan në Spitalin San Jacopo, por mjekët nuk mundën të bënin asgjë për ta shpëtuar.

Dyshohet për një sëmundje të papritur, ndërsa autoritetet kanë paralajmëruar kryerjen e një autopsie për të zbuluar shkakun e vdekjes.

Flavio ishte diplomuar vitin e kaluar në Institutin Filippo Pacini në Pistoia, në degën e shkencave të aplikuara.

Njihej si një djalë i gjatë, atletik dhe i qetë, i apasionuar pas sportit dhe me një karakter të rezervuar. Vdekja e tij ka tronditur jo vetëm familjen, por edhe shkollën dhe komunitetin shqiptar të zonës.

Kjo është humbja e dytë që godet Masotti-n brenda pak ditësh, pas aksidentit fatal që i mori jetën 17-vjeçarit Matteo Ducceschi. Dy të rinj në lulen e jetës, dy tragjedi që kanë lënë një fshat të tërë në zi.