Tiranë, 14 Shkurt 2026 – Pas përpjekjeve të gjata dhe një sfide 12-vjeçare, Xhetan Ndregjoni arriti të rikthejë mbesën e tij, Eva, në shtëpi, pas një udhëtimi të gjatë nga Siria në kufirin me Turqinë. Ai rrëfeu emocionet dhe momentet e paharrueshme në një intervistë telefonike me gazetarin Muhamed Veliu për Top Channel.
Xhetan tregoi se për një dekadë ka tentuar në mënyra të ndryshme t’i sjellë Evën në Shqipëri, të cilën bashkëshorti ia kishte marrë duke e mashtruar dhe e kishte çuar në Siri ku ishte ndarë nga familja. Për vite me radhë ai është përballur edhe me premtime të rreme se do të rikthehej vajza, pa sukses.
“Kemi kaluar 48 orë të vështira pasi Eva mbërriti në kufirin turk me Sirinë,” – tha Xhetan, duke shtuar se autoritetet turke të sigurisë e intervistuan vajzën para se ajo të udhëtonte drejt Shqipërisë me ndihmën e institucioneve shqiptare.
Ai përshkroi emocionet e rikthimit, ku Eva i hyri në qafë dhe e thirri “daja”, e tronditur dhe e lodhur pas një rruge të gjatë. Xhetani tha se ishte e pabesueshme ta shihte pas kaq shumë vitesh, duke përmendur se besonte vetëm zërin e saj nga mesazhet zanore.
Ishte një moment i mbushur me emocion, për të cilin ai shprehu mirënjohje të thellë për të gjithë ata që ndihmuan në rikthimin e Evës pranë familjes. Ai tha se dëshiron që Eva, tani 20 vjeçe, të rindërtojë jetën e saj të rrethuar nga afërsia e familjes, së bashku me vëllanë e saj, Endrin.
Discussion about this post