Tirana do të luajë në dy sfidat e mbetura pa sulmuesin kryesor të saj, Florent Hasanin. Futbollisti ka shënuar në dy sfidat e fundit, i ka dhënë skuadrës 14 pikë me golat e tij, por nuk do të rrezikojë për të qenë në fushë, pasi ka disa fije të ligamentit të këputura dhe stafi mjekësor nuk do të rrezikojë për ta futur në fushë.
Në këto kushte në vend të tij do të luajë Kaina. Klubi kërkon ta shesë në janar lojtarin dhe aktivizimi në këto dy sfida do të ishte thjesht “bixhoz” me shëndetin.
DOKA – Mbrojtësi do të bashkohet sot me skuadrën. Lojtari u ça në buzë gjatë sfidës me Laçin dhe nuk ka qenë në stërvitje, por sot do të bashkohet me grupin. Lojtari ka qenë me antibiotikë dhe ndoshta nuk do të luajë në sfidën e radhës. Në vendin e tij do të luajë Haxhiu. Abazaj do të jetë i gatshëm për sfidën me Vllazninë, ashtu si pjesa tjetër e skuadrës.
PATRIK – Problemi tjetër i Tiranës është Patrik. Sulmuesi ka humbur dy muaj të tjerë, ndërkohë që mendohet për operacion. Mbetet për t’u parë se çfarë do të ndodhë në ditët në vazhdim, por Patrik minimalisht ka humbur dhjetorin.
STËRVITJA – Me skuadrën do të jetë i pranishëm këtë herë edhe Florjan Përgjoni që shleu katër kartonët, ndërsa për këtë sfidë nuk ka asnjë të dënuar. Me grupin e plotë, Ahmataj pritet të luajë me Abdullahun, Haxhiun, Najdovskin, Hoxhallarin, Përgjonin, Metën, Deliun dhe një ngadyshja Lushkja-Jonuzi. Duke përjashtuar ndonjë surprizë treshja Latifi-Kaina e Abazaj nisin ndeshjen nga minuta e parë. Fitorja e Julian Ahmatajt në këtë aventurë me Tiranën ishte pikërisht sfida mes bardhebluve dhe kuqebluve në Kukës. Tirana vazhdon të jetë e treta në renditjen e Superiores.
Discussion about this post