Alketa Hila është emëruar drejtoresha e re e Albpetrol, pas arrestimit të Florian Muçës nga SPAK, si i përfshirë në aferën e inceneratorëve, ku në pranga përfundoi dhe ish deputeti socialist Alqi Bllako.
Hila është emëruar administratore, derisa bordi të bëjë zgjedhjen e drejtorit të ri të kompanisë. Alketa Hila është një ndër njerëzit më të besuar të Erion Veliaj. Ajo ka qenë anëtare e Këshillit Bashkiak, ndërsa gjithashtu ka qenë dikur drejtoreshë e Fondit të Sigurimeve të Detyrueshme të Kujdesit Shëndetësor. Ajo është akuzuar nga opozita se ka qenë firmëtare për shembjen e Teatrit Kombëtar, ndërsa gjithashtu se së bashku me Genti Gazhelin kanë përgatitur tenderin për të privatizuar Alpetrolin.
Këtë herë, Veliaj është kujdesur sërish që t’i sigurojë një post të rëndësishëm të besuarës së tij. Nga ana tjetër, kujtojmë se Muça përfundoi në pranga pas hetimeve të SPAK për inceneratorin e Fierit. Florjan Muça, Azem Shatëri, Erjon Murataj, Sabina Cenameri dhe Etleva Kondi, të cilët kanë qenë anëtarë të komisionit të koncesionit, janë akuzuar nga SPAK për shpërdorim detyre.
Sipas prokurorisë, këta shtetas, në bashkëpunim me Alqi Bllakon dhe ish-ministrin Lefter Kokën, kanë shkelur ligjin për Partneritetin Publik Privat për të favorizuar kompaninë Integrated Technology Services, e cila fitoi koncesionin.
Discussion about this post