Koordinatori i Proexport Albania, Florian Zekja ka folur për situatën e vështirë që po përballen eksportuesit shqiptarë, të cilët prej vitit 2023 po vuajnë pasojat e një kursi të paqëndrueshëm të euros.
Sipas tij, rënia e valutës europiane është bërë faktori kryesor që po dëmton seriozisht sektorin eksportues, përfshirë fasonerinë dhe bujqësinë. Megjithëse problematika është ngritur vazhdimisht në media dhe pranë institucioneve shtetërore, Zekja thotë se nuk ka pasur ndërhyrje të plota dhe efektive nga autoritetet.
Përballë kësaj krize të zgjatur dhe mungesës së zgjidhjeve reale, një pjesë e bizneseve rrezikon të mos mbijetojë në një të ardhme të afërt.
“Mjafton të shohim të dhënat e INSTAT dhe mund të them që vitet e fundit, jo vetëm fasoneritë por të gjithë eksportuesit kanë patur probleme. Problemet kanë ardhur për arsye të ndryshme, por një nga to është shkaku kryesor, euro. Dhe ky nuk është një fenomen i ri, kemi që në 2023 që e kemi këtë problematikë.
Ka patur disa përpjekje, ka patur edhe ndonjë paketë, pro kanë qenë të pjesshme dhe në këtë moment efekti nuk është real. Kështu që është një problematikë që ‘jemi dorëzuar’.
Një gjë është e sigurt që pas këtyre dallgëve si pandemia, tërmeti, luftërat, euro mund të them që në të ardhmen e afërt një pjesë e biznesit nuk do të jenë në këmbë për shumë arsye. Kështu që mund të them që ne po vazhdojmë ato përpjekjet tona. Por shohim që kjo lufta me euro është e humbur, po shohim alternativa të tjera për të shpëtuar kostot”, shprehet ai.
Discussion about this post