Fundjava e fundit e korrikut dhe vendi futet në muajin gusht i cili pritet që të ketë edhe numrin më të madhe të turistëve. Që prej ditës së sotme është vënë re një fluks i madh me turistë, vizitorë e emigrantë në hyrje, në pikat e kalimit kufitar në Rinas dhe Kakavijë. Policia ka bërë me dije se nëpërmjet aeroportit të Rinasit, gjatë orëve të para të mëngjesit e deri tani kanë hyrë 23.000 shtetas shqiptarë dhe të huaj.
“Në Rinas punohet me sportele të shtuara dhe nuk ka probleme deri në këto momente. Policia Kufitare ka marrë të gjitha masat për të eliminuar vonesat, duke shtuar në maksimum sportelet në hyrje”, njofton policia.
Ndërkohë që fluks i madh është dhe në Kakavije, ku gjatë orëve të paradites së sotme, kanë hyrë rreth 6000 shtetas shqiptarë dhe të huaj. Kujtojmë se mëngjesin e sotëm është vënë re një radhë e gjatë rreth 2 km në doganën e Kakavijës pasi pala greke punonte vetëm me një sportel, por mesa duket situata ka ndryshuar dhe tashmë gjithçka i është kthyer normalitetit.
Discussion about this post