Avionët që dikur mburreshin si krenaria kombëtare dhe mbanin emrat e figurave më të ndritura shqiptare si Ismaili, Migjeni e Naimi, janë zhdukur nga qielli shqiptar pa gjurmë. “Air Albania”, kompania që pretendonte të ishte ambasadorja e Shqipërisë në ajër, tashmë operon me avionë pa logo e pa flamur, e madje, me identitet të huaj: i vetmi avion aktiv mban logon “Dana Air”.
Shkaku? Mos-pagimi i qirave për avionët e marrë me kontratë nga kompani ndërkombëtare. Sipas burimeve, avionët janë tërhequr nga qiradhënësit për shkak të borxheve, duke lënë kompaninë pa flotë funksionale.
Situata ka kulmuar me një padi në Gjykatën Britanike nga kompania amerikane “GAT Aircraft and Engine Leasing Limited”, që akuzon Air Albanian për mospagesë dhe shkelje kontrate për dy avionë Airbus A320. Edhe garantuesi i kontratës, “Turkish Airlines”, ka refuzuar të mbulojë detyrimet.
Kjo histori përforcon krizën financiare të kompanisë që dikur u promovua me bujë si simboli i ri i krenarisë shqiptare në ajër, por sot fluturon pa emër, pa flamur… dhe me shumë borxhe.
Ky është thelbi i modelit të biznesit të “Air Albania-s”. Avionët merren me qira, bëjnë disa rrugë dhe zhduken sërish për shkak se tërhiqen mbrapsht nga kompanitë qiradhënëse, pasi nuk paguhen. Aq shpesh vijnë e ikin avionët e “Air Albania-s” saqë kompanisë nuk po i del më koha as t’u stampojë logon e saj dhe simbolet e Shqipërisë. Dy javë më parë, Kapitali publikoi lajmin se kompania flamur e Shqipërisë është paditur në një gjykatë britanike nga kompania amerikane “Gat Aircraft and Engine Leasing Limited” për shkelje të kontratave të qirasë për dy avionë të tipit A320-200.
“Gat Aircraft and Engine Leasing Limited, degë e GA Telesis”, e ka paraqitur padinë më 1 gusht në gjykatën britanike duke pretenduar se transportuesi kombëtar shqiptar ndaloi së paguari qiratë për dy avionët, respektivisht avionin ZA-ASM (msn 3676) dhe atë ZA-MMK (msn 4934), në mars 2025. GA Telesis gjithashtu pretendon se linja ajrore ka shkelur detyrimet e tjera ndaj palëve të treta, përfshirë Eurocontrol. Kjo e shtyu qiradhënësin të ndërpresë kontratat e qirasë.
Kompania amerikane tha se i bëri një kërkesë zyrtare “Turkish Airlines”, si garantues sipas marrëveshjes së qirasë së Air Albania, për pagesën e qirave të papaguara më 14 korrik, të cilën kompania turke refuzoi ta respektonte.
Discussion about this post