Bordi i transparencës të çmimeve të shportës përcaktoi që këtë javë çmimi i vajit me shumicë të jetë 317 lekë dhe me pakicë nga supermarketet 321 lekë për litër. Çmimi prej 321 lekë është mbajtur nga dyqanet e vogla ushqimore edhe javën e kaluar, ndërsa në supermarketeve është reflektuar çmimi sipas vendimit të mëparshëm të bordit të transparencës.
Dyqanet e vogla të tregtimit të produkteve kërkojnë transparencë të vendimeve të bordit për kontrollin e çmimeve të produkteve të shportës me qëllim përballimin e situatës së veçantë të krijuar në treg.
Akti Normativ për monitorimin e përjavshëm të çmimeve për produktet, si: miell, vaj luledielli, sheqer dhe oriz që përcakton edhe vendosjen e gjobave në masën 2 mln lekë për biznesin e tregtimit me pakicë dhe 10 mln lekë për bizneset e shumicës ka shtuar stresin te sipërmarrjet e vogla.
Përfaqësues të dyqaneve me pakicë në kryeqytet të kontaktuar në terren nga “Monitor” pohuan se nuk janë në dijeni të çmimeve të miratuara nga bordi, ndërsa kërkuan që vendimet të jenë transparente, pasi për furnizimet janë të varur nga pikat e shumicës.
Bordi i transparencës për kontrollin e çmimeve të shportës mbajti të pandryshuara për dy javë në mars çmimin e tregtimit të vajit të lulediellit. Për tregtarët e shumicës çmimi i përcaktuar nga bordi i transparencës ishte 299 lekë dhe për shitjet me pakicë 305 lekë për litër. “Marzhi i fitimit i përcaktuar nga bordi për produktin e vajit të lulediellit është shumë i ulët te biznesi i vogël. Ne furnizohemi nga pikat e shumicës të cilat na i sjellin vetë mallin në dyqan dhe për çmimin jemi në varësi të tyre.
Javën e kaluar vajin e lulediellit e kemi blerë me shumicë me çmim 299 lekë për litër. Nwse do ta shesim këtë furnizim 305 lekë marzhi i fitimit është shumë i ulët, pasi edhe ne kemi taksa për të paguar.
Gjoba e parashikuar në ligj në rast se e shet vajin më shtrenjtë se sa tavani do të na falimentonte direkt. Për shkak të marzhit të ulët të fitimit jam e detyruar të ul sasinë e furnizimeve.
Discussion about this post