Propaganda shënoi një kulm të ri javën e kaluar kur nga Berati, qeveria e shpalli Shqipërinë kampione bote në qeverisjen elektronike. Por ndërsa shqiptarët janë mësuar tashmë të dalin kampion imagjinarë të botës në ekonomi, mirëqeverisje, arkitekturë e kështu me radhë, risia ishte një deklaratë monumentale e drejtoreshës së AKSHI-t, Mirlinda Karçanaj. Zonja Karçanaj tha se Shqipëria tashmë duhet të mësojë botën në teknologjinë e informacionit.
“Dixhitalizimi i shërbimeve publike është kthyer në kryefjalë. Unë do të sugjeroja që këtë qasje ta kthejmë në një brand, unë do të sugjeroja emrin ‘e-gov made in Albania’, sepse janë mbi 60 vende, të cilat duan zgjidhje të qeverisjes elektronike. Shqipëria ka tashmë shumë përvojë dhe ne jemi gati ta çojmë këtë përvojë tek këto 60 vende plus sepse kush më mirë se ne” fluturoi Karçanaj, teksa ministrja e sipërmarrjes pohonte me kokë.
Sikur të mos mjaftonte me kaq drejtoresha e AKSHI-t tregoi histori se si Komisioni Europian në Bruksel ishte mahnitur nga Diella dhe se si ambasadori Gonzato i BE-së mbeti i shtangur kur pa inteligjencën artificiale që përkthente ligjet e BE-së.
Por komiciteti i deklaratave të Karçanaj shkonte në proporcion me tragjedinë se si qindra të rinj dëgjonin me seriozitet broçkullat e propagandës. Aktualisht Shqipëria është në vendin e 62-të në botë për qeverisjen elektronike. Dhe është vendi me eksportet më të ulëta të shërbimeve të teknologjisë së informacionit dhe komunikimit.
Për krahasim, Serbia eksporton sot 3.7 miliardë euro në vit shërbime ICT, ndërsa Shqipëria vetëm 240 milionë dollarë. Dhe problemi se pse Shqipëria nuk ka sektor të zhvilluar dixhital është pikërisht AKSHI, e cila e ka mbytur tregun me tenderat e saj duke krijuar një rreth kompanish, që përveç tenderave që marrin nga AKSHI nuk mund të konkurrojnë dot askund në tregjet e huaja. Përfshirë kontraktorin e preferuar të zonjës Karçanaj.
Discussion about this post