Fondi Monetar Ndërkombëtar në konferencën e përbashkët me Bankën e Shqipërisë është shprehur kundër amnistisë fiskale. Sipas Fondit, qeveri duhet të krijojë një strategji si të rrisë të ardhurat dhe heqja e TVSH nuk është një zgjidhje e mirë.
Sakaq, FMN sugjeroi që Ministria e Financabe të hartojë një njësi vetëm për politikat tatimore.
“Ne vazhdojmë të këshillojmë kundër amnistisë tatimore dhe përjashtimeve e incentivave tatimore ADHOC, të cilat shkojnë në drejtim të kundërt me strategjinë afatgjatë të qeverisë për rritjen e të ardhurave tatimore. Ne shohim nevojën për krijimin e një njësie të dedikuar në Ministrinë e Financave dhe Ekonomisë (MFE) për politikat tatimore që të ketë burime dhe personelin e duhur”, u shpreh FMN.
Ndër të tjera drejtuesja e FMN këshilloi që përdorimi i akteve normative për të ndryshuar buxhetin brenda vitit duhet të ndërpritet. Ndërsa u ka kërkuar edhe Bankës së Shqipërisë të bëjë kujdes me nivelin e kredive të këqija, në mënyrë që të mos cenohet financimi i ekonomisë.
“Rreziku i rritjes së kredive me probleme thekson rëndësinë e fuqizimit të kuadrit ligjor të ndërhyrjes së jashtëzakonshme dhe falimentit. Kuadri rregullator për trajtimin e huamarrësve të mëdhenj me kredi nën standard në më shumë se një bankë (i quajtur qasja e Tiranës) gjithashtu duhet të zbatohet më gjerësisht. Përtej mandatit të Bankës së Shqipërisë, kuadri ligjor për falimentit dhe ndërhyrjen e jashtëzakonshme që kanë hyrë në fuqi, duhet të zbatohet me shpejtësi, përfshirë dhe ristrukturimin e kredive jashtë gjykatës. Ngërçi i gjatë në reformën e përmbarimit duhet gjithashtu të zgjidhet”, tha FMN.
Në përfundim, FMN tha se duhet bërë kujdes edhe me nivelin e lartë të informaliteti.
