Edicioni i 12-të i konkursit ndërkombëtar të fotografisë, “Fokus Award”, ka ulur siparin dhe fitues është shpallur iraniani Majid Hojati duke fituar shumën e 1 mijë dollarëve.
“Tani jam i kënaqur, lodhja iku. Jam shumë i lumtur sepse prej vitesh punojmë për këtë aktivitet. Kemi bërë një grup shumë të mirë fotografësh profesionist nga anë e mbanë Shqipërisë. Pandemia është e vështirë për të gjithë, por kjo është edhe sfida. Artisti ka nevojë që të ndihet i pranishëm me punën e tij. Pavarësisë vështirësisë ne ja kemi dalë.”- tha fituesi.
Ekspozita është titulluar “Monos” dhe ka pasur 44 pjesëmarrës nga 15 vende të ndryshme të botës që u përzgjodhën nga kuratorët.
Drejtori artistik i “Fokus Award” Arben Alliaj tha se në një botë ku ne jemi shndërruar më shumë në objekt sesa subjekt është mirë të qëndrosh larg stimujve të sipërfaqes.
“Në një botë e cila është transformuar në një vorbull tërheqëse duke na shndërruar më shumë në objekt sesa subjekt, sfida e vërtetë është tashmë “tërhequrit”. Të reduktosh, të konsumosh, të hollosh, të heqësh koret, të thërrmosh deri në esencë. Të qëndrosh larg stimujve të sipërfaqes, i vetëm në unitetin tënd. Mono, si bazë etimologjike e mijëra fjalësh të ndryshme nga njëra-tjetra por si një qëndrim artistik për të synuar esencën.”- thotë Arben Alliaj.
Aktiviteti u zhvillua ne ambiente te jashtme të galerisë së artit Vilson Kilica ndërkohë qe ekspozita ishte organizuar në sallën brenda godinës ku admiruesit e ndoqën në grupe të vogla për shkak të situatës së Covid-19
