Kryetari i Partisë Demokratike Lulzim Basha në një konferencë për mediat është pyetur nga gazetarët edhe se përse nuk po del në terren për të komunikuar me bazën, ashtu siç po bën Sali Berisha. Në përgjigjen e tij, Basha tha se ka dalë më shumë se çdo kryetar tjetër i PD në këto 30 vite, por shtoi se nuk do të donte të vendoste liderin historik të demokratëve në pozita inferioriteti.
“….Do dal përsëri. nuk jam nga ata që shfrytëzoj momente të tilla për të bërë garë se kush e ka autokolonën më të gjatë dhe kush i mbush sallat më shumë, sepse e di që ajo është një garë e lehtë për mua dhe nuk është e drejtë ndaj askujt. As ndaj zotit Berisha, ta vendos në pozicion të tillë inferioriteti.”
Nga ana tjetër, kreu i Partisë Demokratike Lulzim Basha ka mohuar edhe njëherë se do të japë dorëheqjen. Në një konferencë për mediat, Basha u pyet nga gazetarët se sipas një sondazhi 85% e demokratëve nuk e duan, dhe a do të jepte dorëheqjen për të mos e përçarë partinë. Basha tha se sipas sondazheve të tij 95% të demokratëve duan që të vazhdojë betejën. “Sipas sondazheve të mia 95% e demokratëve kërkojnë që unë të udhëheq betejën kundër regjimit Rama-Doshi-Rakipi dhe mbështesin axhendën e prezantuar nga unë për të pastruar llumin në politikë,” tha Basha.
