Ish-sekretari i Përgjithshëm i PD, Arben Ristani, ka folur sot gjatë një interviste televizive mbi hapat e ardhshëm të PD pasi të mblidhen dhe dy “Foltoret” e fundit. Ristani theksoi se ‘Foltorja’ do të jetë një alternativë në zgjedhjet e ardhshme. Sipas tij me mbledhjen e Kuvendit do të ndryshojë statuti i PD dhe partia do ketë në thelb demokracinë, që po i zbehej. Ristani tha se statuti i ri PD do të jetë shembull për çdo parti në vend.
“Foltorja ka ndezur motorët jo vetëm të ringritjes së saj por për të qenë një alternativë në zgjedhjet e ardhshme. Ajo që do ndodhë më tej është se, do mblidhet Kuvendi i PD ku do të ndryshojë statuti i saj për ta bashkuar PD për ta hapur dhe për ta demokratizuar atë. Në mënyrë që të japi një shembull jo vetëm për mënyrën se si organizohet një parti e vërtetë demokratike por edhe për të gjithë shoqërinë shqiptare, edhe për partitë e tjera që u mungon ajo skemë organizmi që do bëjë PD në ndryshimet statutore”, u shpreh ai.
Ndër të tjera ai tha se, PD-së i ka munguar kjo lloj energjie që përcjell foltorja dhe po rrinte në gjumë nga humbja në humbje së bashku me kryetarin e saj. Foltorja e ka ringjallur situatën. Ndërkohë, pak minuta më parë Berisha tregoi se janë mbledhur 2/3 e votave dhe ngritja e Kuvendit të PD do të jetë shumë shpejt.
