"Dhanë lejen për të gërryer Shkumbinin"/ Berisha nga Durrësi: Të gjitha rrugët u shembën -

“Dhanë lejen për të gërryer Shkumbinin”/ Berisha nga Durrësi: Të gjitha rrugët u shembën

Këtë të martë kreu i PD Sali Berisha është ndalur në Durrës, ku ka mbajtur Foltoren e radhës. Berisha është pritur nga mbështetës të tij. Kreu i PD deklaroi se qeveria e kryeministrit Rama e ka kthyer korrupsionin në sistem.

Berisha ka hedhur akuza edhe për infrastrukturën, duke akuzuar qeverinë për vjedhje.

“Kush i vodhi 42 mln për pastrimin? Kush e spostoi hidrovorin në kundërshtim me të gjitha kondicionet e hidrovoreve? Që të gjithë pronësi shtetërore të vjedhura nga vetë shteti. Këta që qeverisin sot shqiptarët, sillen si pushtuesit më të egër që kanë njohur ndonjëherë”, tha ai, duke shtuar: “Ata që kanë ndërtuar atë rrugë kanë ndarë paratë me qeveritarët. Të gjitha rrugët u shembën dhe askush nuk ka përgjegjësi. Thonë na i shembi natyra. Dhanë lejen për të gërryer shtratin e Shkumbinit dhe për të hedhur rrugën që është të paktën 70-vjeçare. U shemb edhe tuneli, por e fshehën tunelin e shembur. Sa të rrezikshëm dhe sa të pamëshirë janë. Një përzierje, mafie shtetërore e zyrtarëve me mafiozë të tjerë që rëndojnë mbi shpatullat e trupin tonë dhe largojnë shqiptarët nga Shqipëria”, tha ai.

Berisha tha se Rama e mbron Ballukun sepse ka hallin e tij, ndërsa shtoi se Balluku është kapur me vjedhje të mëdha, por pavarësisht kësaj, kryeministri e mbron.

“Që të dalin dokumente duke vjedhur dhe ka tre muaj që mban vendin peng dhe nuk i heq imunitetin asaj që ka të regjistruara 300 apartamente. 15 markete, 2-3 vila në Dhërmi, pa llogaritur cfarë ka në Greqi dhe vende të tjera. Para dy ditësh ju tha ju se ka bërë punë të jashtëzakonshme…por ajo ka bërë vjedhje të jashtëzakonshme. Por vjen një moment që duhet të pranojmë që këta njerëz që janë në pushtet për të garantuar të drejtat e shqiptarëve, apo që të vjedhin çdo ditë dhe të qëndrojnë mbi ligjin!? Nuk kam dëgjuar që të ketë qeveri që të kapet hajdute dhe të bëjë ligjin që nuk mund të kapet. Kjo është njësoj ‘si të thuash që vjedhja është legjimite’. A mund të presim nga organizatë kriminale zgjidhje? Përkundrazi cdo ditë që kalon bëhet më keq. Ai fushatën e bëri me integrimin europian. A do lejojmë ne që kriminelë si Rama dhe Vuçiç të mbyllë dyert e Europës për ne? Kurrën e kurrës! Ky Shqipërinë do ta shndërrojë në çifligun e tij për ta vjedhur. Por tashmë stina është e demokratëve”, tha ai.

gijotina.com/

Etiketa: Sali Berisha