Mbledhja e firmave të demokratëve për mbledhjen e Kuvendit Kombëtar ka shkaktuar tension në degët e PD në rrethe. Teksa foltorja e radhës do të zhvillohet në Kukës, Ardian Gjana me anë të një statusi në rrjetet sociale shkruan se ka pasur tre telefonata nga miqtë e shokët për të firmosur Peticionin për të mbledhur Këshillin Kombëtar.
“E ka pre në besë është i shitur tek Rama. Ndoshta i ka të gjitha, nuk i di, nuk kuptoj politika të mëdha unë. Por ama një gjë di që dashuria mes tyre ka qenë shumë e madhe dhe nuk ja dërgova unë Berishës Bashën, por ai e solli tek ne”, shkruan demokrati.
Më tej ai rendit disa fakte nëpërmjet të cilave fajëson Berishën që solli Bashën në pushtet për të mbrojtur interesat e tij.
“Në pushtet ishim me Berishën dhe humbëm në 2013 fal arrogancës të ministrave dhe drejtorëve të përjetshëm të Sali Berishës dhe ata i shikoj sërish në krah të tij edhe sot. Kjo humbje na vjen falë ndryshimeve kushtetuese që bëri Berisha me Ramën në 2008. Me Berishën ishim dhe ne 2009 dhe nuk fituam por morëm krimbin LSI dhe e futem mes nesh. Berisha ishte ai që hodhi i pari idenë për daljen nga parlamenti dhe e mbrojti me çdo kusht. Dhe unë nuk mund ta fal dot Berishën pse kërkon falje në çdo takim që bën”, shkruan Gjana.
Ish-kryeministri Sali Berisha do të mbajë ‘Foltoren’ e tij të martën në Kukës ku do të mbledhë firma për të shkarkuar Lulzim Bashën nga kreu i PD-së përmes Këshillit Kombëtar të partisë. Demokratët janë të ndarë mes liderit historik Sali Berisha dhe liderit aktual Lulzim Basha.
