Rusia e ka quajtur provokim dhe presion vendosjen e shtabit të forcave speciale amerikane në Shqipëri. Të paktën kështu shprehen mediat ruse, të cilat shkruajnë se SHBA po përpiqet t’iu bëjë presion. “Një përpjekje tjetër e SHBA-së për të ushtruar presion ndaj Rusisë është rritja e fuqisë ushtarake në Gadishullin Ballkanik”, shkruajnë mediat në Moskë.
Sipas ekspertit politik Rick Rosoff, informacioni ka dalë për krijimin e një shtabi të avancuar të forcave speciale amerikane në Shqipëri. Për momentin, Shqipëria është partneri kryesor i SHBA-së në Ballkan dhe Rosoff është i bindur se Uashingtoni planifikon, me ndihmën e Tiranës, të zvogëlojë ndikimin e Moskës mbi Beogradin, pasi Serbia është aleati i vetëm i Rusisë në gadishull.
Në rast se Aleanca Veriatlantike arrin të nënshtrojë Serbinë, atëherë Rusia do të humbasë partnerin e saj kryesor në rajon. Megjithatë, nëse përpjekja është e pasuksesshme, atëherë NATO do të ketë një tjetër pikë të nxehtë në Ballkan për presionin ndaj Moskës.
Discussion about this post