Forcat ushtarake franceze kanë vrarë ditën e mërkurë Adnan Abu Walid al-Sahrawi, udhëheqësin e grupit xhihadist të Shtetit Islamik në Saharanë e Madhe.
Lajmin e bëri të ditur presidenti Emanuel Macron përmes një postimi në Twitter, teksa shkruan se ky është një sukses i madh.
“Ky është një tjetër sukses i madh në luftën tonë kundër organizatave terroriste në Sahel,” shkruan presidenti francez.
Sipas mediave franceze, udhëheqësi i këtij grupi konsiderohet përgjegjës për shumicën e sulmeve në Mali, Nigeri dhe Burkina Faso. Adnan Abu Walid al-Sahrawi kishte vënë në shënjestër trupat amerikane në një sulm vdekjeprurës në tetor 2017, në të cilin katër ushtarë të forcave speciale amerikane dhe katër nigerianë u vranë në një pritë në jugperëndim të Nigerisë.
Në fund të vitit 2019, Shteti Islamik në Saharanën e Madhe kishte kryer një seri sulmesh në shkallë të gjerë kundër bazave ushtarake në Mali dhe Nigeri. Më 9 gusht 2020, në Nigeri, udhëheqësi i organizatës xhihadiste urdhëroi personalisht vrasjen e gjashtë punonjësve franceze dhe shoferit të tyre nigerian.
