Policia e Shtetit ka mundur që të zbardhë ngjarjen e rëndë të ndodhur në Shëngjin, ku u vra biznesmeni Ardian Nikulaj.
Edmond Haxhia mësohet se është porositësi dhe financuesi i gjithë operacionit të vrasjes së biznesmenit, ndërsa shtetasit britanikë Harry Simson, Thomas Mithan, Steven Hunt dhe Harriet Bridgeman janë 4 britanikët që kanë ndihmuar për të kryer vrasjen. Portugezi Ruben Saraiva dyshohet se ishte ekzekutori.
Vrasja është zbuluar nga kamerat e sigurisë së Shëngjinit dhe të lokalit “Koral”, që ishte ‘blinduar’ me kamera.
Familja Nikulaj ka marrë akses në kamera edhe përpara policisë. Familjarët e të ndjerit e kanë pasur foton e vrasësit që në ditën e parë.
Kamera e ka fiksuar pamjen e vrasësit, për shkak se ekzekutori ka qëndruar në një pallat në ndërtim, jo shumë larg vendit ku ndodhi ngjarja. Fushëpamja e kamerave ka qenë e pastër.
Ardian Nikulaj rrinte gjithmonë me dy kushërinj të tij, ndërsa ditën e vrasjes ata kane qenë 50 metra më larg, në një biliardo dhe sapo kane dëgjuar krismat, kanë shkuar te lokali dhe janë ndërruar rrugës me vrasësin.
Nikulaj u ekzekutua mesditën e 19 prillit kur sapo kishte hyrë dhe ulur në një tavolinë në lokalin në pronësi të tij në vijën e parë të plazhit të Shëngjinit. Autori, siç u pa nga pamjet, mbante një maskë kirurgjikale, skafandër dhe jelek fosforeshent. Ai futet në lokal, qëllon me armë Nikulajn dhe pasi kryen vrasjen me pistoletë në një distancë shumë të afërt largohet qetësisht me motor nga vendngjarja.
Nikulaj ishte biznesmen në Lezhë, ish-kandidat për deputet në zgjedhjet e 2021-shit dhe kandidat për Këshill Bashkiak në zgjedhjet e 14 majit. Viktima rezulton i arrestuar më herët për armëmbajtje pa leje dhe kontrabandë e falsifikim, ndërkohë që pista ku po hetohej ishte ajo e gjakmarrjes.
Discussion about this post