Personi që shihni në foto është Hysni Qestaj, shqiptari i Kosovës, me profesion DJ që humbi jetën në një aksident në Itali.
Lajmin e ka bërë të ditur Komuna e Junikut, e cila përmes një reagimi zyrtar në rrjete sociale teksa ndan dhimbjen me familjen e të ndjerit, ka postuar edhe një foto të të riut.
“Në një aksident të rëndë trafiku, bashkëvendasi ynë Hysni Qestaj ka ndërruar jetë. Kryetari i komunës z.Ruzhdi Shehu dhe të gjithë qytetarët e Junikut ndajnë dhimbjen me familjen e të ndjerit. I ndjeri të kujtohet gjithmonë me respekt dhe dashuri”, thuhet në njoftim.
Aksidenti
Qestaj ka humbur jetën në një aksident tragjik në Itali teksa udhëtonte me një mjet tip ‘Ferrari’, të dielën.
Mediat italiane shkruajnë se Ferrari i bardhë po lëvizte me shpejtësi mbi 200 km/h kur ka rrëshqitur në rrugën e lagësht dhe është përplasur në anësore. Makina u copëtua, copat u shpërndanë dhe flakë të mëdha u panë në autostradë. Bashkë me shqiptarin në makinë ishte dhe një grua e cila po ashtu ka ndërruar jetë.
40-vjeçari vetëm disa orë para vdekjes, ishte në një klub nate në kantonin e Valais dhe pas performancës ishte nisur me Ferrari për në Itali. Vëllai i tij 41-vjeçar ka konfirmuar se automjeti i përkiste atij, raportuan mediat zvicerane.
“Është e vështirë ta përshkruash me fjalë këtë person të madh dhe pozitiv. Por nëse do të më duhej ta përshkruaja me një fjalë, do të thosha se ai ishte personi më i dashur që e kam njohur”, citohet ai nga “Blick”.
Vëllai i viktimës thotë se nuk e di se si ndodhi aksidenti, kush ishte në timon dhe kush ishte viktima tjetër.
“Për momentin nuk kemi marrë shumë informacion nga policia. Vëllai im tjetër, i cili jeton në Itali, tani kujdeset për gjithçka.”
Discussion about this post