Të tjera detaje janë publikuar lidhur me grabitjen që ndodhi në një argjendari në zonën e Kamzës, ku 3 persona të armatosur dhe të maskuar, kanë marrë një sasi bizhuterish floriri. Dyshimet janë se nga argjendaria është grabitur rreth 1 kg flori.
Nga pamjet, rezulton se autorët e dyshuar janë larguar me një tip “BMW” ngjyrë të bardhë. Nga verifikimet rezulton se automjeti kishte targa të falsifikuara, që i përkasin një mjeti tip Hyundai, ndërkohë që dyshohet se autorët janë larguar në drejtim të Laknasit.
Dyshohet se autorët kanë ardhur nga drejtimi i Fushë Krujës, janë parkuar pranë argjendarisë, brenda pak minutash kanë realizuar grabitjen dhe janë larguar.
Autorët, sipas policisë kanë marrë disa bizhuteri floriri që ndodheshin mbi tavolinë për shitje.
Autoritetet thonë se kanë ngritur disa pika të përkohshme kontrolli në Tiranë, Durrës, Lezhë, Kukës dhe Shkodër.
Po sipas policisë, për këtë rast është krijuar një grup i posaçëm hetimor me specialistë të strukturave të posaçme të luftës kundër krimeve të rënda.
Grupi hetimor mbi bazën e të dhënave të administruara po punon për zbardhjen e dokumentimin e autorësisë të kësaj ngjarje.
Discussion about this post