Policia arrestoi ditën e sotme Albano Velo (në foto), i dyshuar si organizator i vrasjes së Edmond Papës në 16 dhjetor në Tiranë.
30-vjeçari i lindur në Këlcyrë, Përmet dhe banues në Tiranë është shok i Aleksandër Sadikajt, i ekzekutuar në mënyrë makabre në qershor 2022 teksa makina me të cilën udhëtonte u hodh në erë në afërsi të TEG.
Dyshohet se ekzekutimi i Sadikajt është porositur nga Edmond Papa dhe shkak është bërë prishja e pazareve të drogës. Saga e hakmarrjes është vazhduar nga miqtë e Sadikajt, që dyshohet se organizuan vrasjen e Edmond Papës pasditen e 16 dhjetorit.
Policia shpalli në kërkim edhe shtetasin A. B., 44 vjeç, banues në Tiranë bashkautor i krimit ku dyshohet se kanë marrë pjesë më shumë se dy persona.
Edmond Papa u vra me armë zjarri pasditen e 16 dhjetorit në rrugën “Fadil Bodinaku” në Tiranë, në lokalin në pronësi të shtetasit V. Sh.
Mësohet se viktima ka qenë i dënuar më parë në Greqi për drogë, por ende asgjë nuk është konfirmuar nga policia.
Discussion about this post