Ka nisur në bulevardin “Dëshmorët e Kombit” protesta e thirrur nga opozita, ku mijëra mbështetës të saj, janë mbledhur përpara godinës së Kryeministrisë. Protesta e opozitës është hapur nga Luçiano Boçi, nënkryetar i PD-së, i cili tha se sot qytetarët janë mbledhur për shkak të lakut në fyt që Qeveria e Edi Ramës i ka vendosur çdo shqiptari, nga të rinjtë te pensionistët.
Boçi tha se këto godina nuk janë tuajat, por janë vendet ku bëhen pazaret e pista të Qeverisë, janë godina ku lulëzon krimi, korrupsioni, afera, ku vritet e ardhmja e çdo shqiptari.
“Na takon ne ti shembim ato porta, ti hapim dyer, pasi vetëm kështu, njerëzit do të marrin në dorë fatet e tyre. Ne duhet të vazhdojmë luftën tonë, ne duhet të vazhdojmë betejat tona, pasi vetëm kështu do të bëjmë drejtësi dhe këtë Kryeministër do e çojmë pas hekurave”, tha Boçi.
“Ne jemi të bashkuar si zë i vetëm kundër pushtetit të korruptuar të Edi Ramës. Diktaturat nuk lulëzojnë, nëse ne jemi të bashkuar. Ne nuk duhet të dorëzohemi, do vazhdojmë luftën. Ne jemi sot të bashkuar, që të jemi të guximshëm. Këto nuk janë godina shteti, por janë godina, ku merren vendime për dënimin e opozitës, janë vende ku grabiten pasuritë tuaja.
Ne do të marrim zvarrë ngrehinën e korrupsionit. Lufta jonë është e vështirë, është e pabarabartë. Por ama është lufta më e madhe dhe më e drejtë. E madhe në qëllimet dhe idealet e saj. Ta luftojmë jetën tonë, me pasionin e Sali Berishës, ta luftojmë me forcën e rinisë”, shtoi ai.
Discussion about this post