Është zbuluar identiteti i shqiptarit për të cilin autoritetet greke po presin analizat e ADN-së, nëse është i njëjti person me trupin e gjetur të ekzekutuar dhe më pas të djegur në zonën e Skourtas, në Viotia të Greqisë.
Bëhet fjalë për 27-vjeçarin Sulo Astrit Halili, me origjinë nga Becishti i Tepelenës, i cili rezulton i zhdukur prej pasdites së 4 nëntorit. Ai kishte ikur nga banesa e tij në Halkida dhe prej atëherë nuk ka dhënë asnjë shenjë jete. Mjeti i tij është gjetur më pas i braktisur në zonën e Vilias, në Athinë.
Sipas përshkrimit të familjarëve, Halili ka flokë të shkurtër ngjyrë kafe të errët, sy kafe, është 1.70 metra i gjatë, i dobët, me mjekër dhe një tatuazh në krahun e majtë me dy trëndafila, një yll dhe disa shkronja. Ditën që u zhduk, ai kishte veshur këmishë të zezë, pantallona xhinse të zeza Cargo dhe atlete të bardha.
Sipas autopsisë së kryer mbi trupin e gjetur të premten, viktima ishte qëlluar me armë zjarri dhe më pas ishte djegur. Trupi u gjet në sediljen e pasme të një makine të vjedhur në Glifadha, e cila kishte targa të falsifikuara të një automjeti nga Katerini.
Autoritetet greke dyshojnë se viktima mund të jetë përfshirë në aktivitete kriminale, ose mund të jetë gjendur rastësisht në vendin e gabuar në kohën e gabuar.
Pritet që analizat e ADN-së të konfirmojnë zyrtarisht identitetin e tij në ditët në vijim.
Discussion about this post