Një 37-vjeçar ka rënë në prangat e policisë së Sarandës pasi ka fotografuar fletën e votimit. Bëhet fjalë për Lulëzim Tarllamishin, i cili u shoqërua këtë mesditë bashkë me gruan e tij sepse shkelën rregullat e votimit. Mësohet se policia ka marrë nën hetim edhe gruan e tij. Ndërsa theksohet se ata janë dorëzuar vetë në polici, pasi janë kritikuar nga komisionerët për veprimin e bërë.
“Komisariati i Policisë Sarandë ka marrë njoftim nga shtetasi O. Sh., vëzhgues në Qendrën e Votimit nr.4731, Xarrë, se dy shtetas kishin fotografuar fletët e votimit dhe më pas kishin dalë jashtë Qendrës së Votimit. Specialistët për Hetimin e Krimeve të Komisariatit të Policisë Sarandë menjëherë kanë njoftuar prokurorin e gatshëm, për këtë rast. Dy bashkëshortët dhe vëzhguesi janë paraqitur me vullnetin e tyre, në Prokurorinë e Sarandës.
Në vijim të veprimeve u arrestua shtetasi L. T., 37 vjeç, banues në Xarrë, Konsipol dhe nisi procedimi në gjendje të lirë për bashkëshorten e tij, shtetasen E. T(C)., për veprën penale “Shkelja e fshehtësisë së votës”. Në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Sarandë, po vijojnë veprimet hetimore për zbardhjen e plotë të rrethanave të këtij rasti”, njofton policia.
Discussion about this post