Deputeti i Partisë Demokratike Arbi Agalliu, ka komentuar foton e bërë virale, ku shfaqet ai në një ambient në Vlorë shoqëruar nga kryeministri Edi Rama. Ai është shprehur se takimi ka qenë rastësor, ndërsa prezentë kanë qenë dhe persona të tjerë.
“Nuk ka asgjë më shumë sesa duket në foton e nxjerrë si sensacion nga specialistët e manipulimit dhe të dhunës verbale e fizike. Është një përshëndetje 2 muaj më parë (13 nëntor), siç këmbehen 2 njerëz në të njëjtin mjedis dhe kaq!”, shprehet ai.
Ai deklaroi se takimi dhe përshëndetja e personave me bindje tjetër politike është pjesë e kulturës së tij, që nuk ndikon në veprimtarinë e tij politike.
“Në kulturën dhe formimin tim nuk kam asnjë kompleks të përshëndes këdo. Në jetën time profesionale kam takuar dhe do takoj pafund njerëz me bindje të ndryshme politike, me pozicione të ndryshme e statuse të ndryshme. I besoj sjelljes qytetare dhe profesionale!”, u shpreh ai.
Agalliu u shpreh se nuk ka asnjë marrëveshje me Ramën, por thjesht çështja po merr përmasa të mëdha. Megjithatë ai thekson se i vjen mirë që aktiviteti i tij politik dhe jo vetëm ka interes publik.
“Me Edi Ramën nuk kam bërë kurrë asnjë pazar, asnjë marrëveshje, asnjë cënim të interesit publik! Nga një anë më vjen keq që bëjnë qimen tra. Nga ana tjetër, më vjen mirë që kanë kaq shumë interes për aktivitetin tim politik dhe privat”, tha Agalliu.
Deputeti i PD-së i konsideroi lajmet e shpërndara si shantazh ndaj tij.
“Të tilla lajme të sajuara keq i konsideroj si përpjekje shumë idiote për shantazh! Le të vazhdojnë! Unë kam zgjedhur të punoj për një të ardhme më të mirë për Partinë Demokratike dhe për vendin!”, përfundoi Agalliu.
Discussion about this post