Kryetarja e Kuvendit, Lindita Nikolla, ka pritur në takim ambasadoren franceze në Shqipëri, Elisabeth Barsacq. Barsacq e uroi Nikollën për zgjedhjen në postin e Kryetares së Kuvendit dhe shprehu vullnetin e Francës për të vazhduar e intensifikuar bashkëpunimin me Shqipërinë.
Gjatë takimit, ambasadorja franceze gjithashtu informoi Nikollën mbi qëndrimin më të fundit të Francës në favor të mbajtjes së Konferencës së parë Ndërqeveritare brenda vitit 2021.
Nga ana tjetër, kryeparlamentarja u shpreh e bindur se vendi ynë ka përmbushur pesë prioritetet, kushtet e Bundestagut gjerman si edhe kushtet e Këshillit të Marsit 2020 dhe jemi gati të ulemi në Konferencën e parë Ndërqeveritare.
“Politika e jashtme e Shqipërisë është qind për qind në koherencë me politikën e jashtme të BE-së. Ne kemi përmbushur pesë prioritetet, kushtet e Bundestagut gjerman si edhe kushtet e Këshillit të Marsit 2020 dhe jemi gati të ulemi në Konferencën e parë Ndërqeveritare me BE, brenda vitit 2021. Metodologjia e re e rishikuar e zgjerimit duhet të vlerësohet si një hap i ri për të ruajtur e mbështetur progresin e integrimit në BE të rajonit, veçanërisht hapjen e negociatave të pranimit të Shqipërisë. Procesi i integrimit në BE bazohet në meritat e çdo vendi, duke bërë kujdes që të mos pësojë krisje nga qëndrimet e ndonjë vendi anëtar. Përsa i përket Kuvendit, me opozitën si pjesë aktive tij, unë do të bëj të mundur lehtësimin e bashkëpunimit për reformat dhe shërbimin ndaj qytetarëve“, tha ajo.
Kryetarja Nikolla vlerësoi edhe angazhimin e Francës dhe të Presidentit Macron në Ballkanin Perëndimor si edhe në nxitjen e mbështetjen e dialogut mes Serbisë dhe Kosovës.
