Që kur Leo Messi shënoi penalltinë e tretë të kompeticionit kundër Kroacisë, fjala “penallti” ka qenë në gojën e të gjithëve. Ja pra, me “asist” të argjentinasit krijohet një mundësi për të përpiluar të gjitha statistikat dhe shifrat lidhur me ekzekutimet nga pika e bardhë.
267 është numri i 11- metërshave të akorduara në historinë e Kupës së Botës. Rekordin e mban edicioni i vitit 2018-të, gjatë të cilit u vërshëllyen 29 penallti. 56 penallti nga 267 nuk janë shndërruar në gola. Kjo shifër përkon me 20.9 për qind të totalit.
19 penallti e bëjnë Spanjën skuadrën që ka goditur më shumë herë nga pika e bardhë nëpër Kupa Bote. E të mendosh që deri në vitin 1982, i ishte akorduar vetëm një…
2 penallti nga 19 ka humbur Spanja, e që të dyja rastet u regjistruan në edicionin e vitit 2010-të, në fund të të cilit “La Roja” u kurorëzua kampione bote.
- Leo Mesi dhe Herri Kejn janë dy lojtarët e vetëm në histori që kanë ekzekutuar nga 5 penallti në Kupën e Botës. Mesi shënoi 3 dhe humbi 2, ndërsa Kane ka humbur vetëm një (kundër Francës).
- Vetëm dy lojtarë kanë shënuar 4 penallti në një edicion të Botërorit: portugezi Euzebio në 1966-ën dhe holandezi Rob Rensenbrink në 1978-ën. 4 penallti të marra, 4 të konvertuara.
- Pas Euzebios dhe Rensenbrinkut, janë katër lojtarët që kanë shënuar 3 penallti gjatë një edicioni të Kupës së Botës: Hristo Stoichkov në 1994-ën, Antuan Griezman dhe Herri Kejn në 2018-ën. Leo Mesi sivjet ka shënuar tre, por Botërori i tij i mundëson edhe një ndeshje.
2 Skuadra kishin shënuar 4 penallti gjatë një edicioni të Kupës së Botës: Holanda në 1978-ën dhe Portugalia në 1966-ën.
4 Penallti ka fituar Argjentina këtë Botëror, më shumë se çdo kombëtare tjetër.
- Meksika ka marrë më shumë penallti në Kupën e Botës se Italia: 13 për meksikanët, 11 për italianët.
- Ndër skuadrat që kanë fituar të paktën një herë Kupën e Botës, ajo që ka marrë më pak penallti në historinë e saj është Uruguai. Vetëm 5 penallti në 60 ndeshje, ose 0.08 penallti për ndeshje.
5 penallti janë akorduar në favor të Arabisë Saudite në vetëm 19 ndeshje të luajtura, ose 0.26 penallti për ndeshje.
0 penallti për “Luanët e Atlantit”. Në fakt, Maroku, gjysmëfinalist i këtij edicioni, nuk e ka shijuar asnjëherë ndjesinë e 11-metërshit.
0 penallti në historinë e Botërorëve për Xhamajkën, Hondurasin, Irlandën e Veriut, Korenë e Veriut, El Salvadorin, Zelandën e Re, Turqinë, Angolën, Bosnjën dhe Kinën.
- Leo Mesi nuk është i vetmi argjentinas që ka shënuar 4 penallti në Kupën e Botës. Gabriel Batistuta, gjithashtu, shënoi 4:2 në 1994-ën dhe 2 në 1998-ën.
9 portierë kanë pritur dy penallti në Kupën e Botës: Abrahamson (Suedi, 1938), Tomashevski (Poloni, 1974), Meola (SHBA, 1990), Zubizarreta (Spanjë, 1990), Fridel (SHBA, 2002), Kazijas ( Spanjë, 2002 dhe 2010), Kavaguçi (Japoni, 2006 dhe 2010), Shmajkëll (Danimarkë, 2018) dhe Shezni (Poloni, 2022).
- Spanja është kombi ndaj të cilit janë mohuar më shumë penallti: gjithsej 5. Vetëm pas vijnë Franca dhe Polonia, ndaj të cilëve u munguan 4 penallti.
- Midis dështimit të skocezit John Hjui kundër Bluve më 15 qershor 1958 dhe atij të suedezit Stafan Taper kundër Polonisë më 26 qershor 1974, asnjë penallti nuk u humb. Një seri prej 25 penalltish të shënuara, duke përfshirë 16 vite me gjuajtje të pamëshirshme./panoramasport.al
Discussion about this post