Gjykata e Shkallës së Parë e Juridiksionit të Përgjithshëm Sarandë ka caktuar masën e sigurisë “arrest në burg” për shtetasin francez Z.K., i akuzuar për veprën penale “Mashtrimi kompjuterik”.
Nga hetimet paraprake dyshohet se shtetasi francez, në bashkëpunim me persona të tjerë, ka përvetësuar të dhëna bankare të qytetarëve shqiptarë përmes skemave mashtruese online.
Autorët dyshohet se përdornin karta SIM të regjistruara me identitete të tjera dhe dërgonin mesazhe masive mashtruese në emër të Postës Shqiptare.
Në mesazhet e dërguara pretendohej se qytetarët kishin një pako që duhej të kalonte procedurat doganore, duke i orientuar ata të klikojnë në një link të dyshimtë për të kryer pagesën.
Më datë 26 maj 2026, me kërkesë të Prokurorisë, gjykata vendosi ndaj shtetasit francez masën shtrënguese “arrest në burg”, ndërsa hetimet vijojnë për identifikimin e personave të tjerë të përfshirë në këtë skemë mashtrimi kompjuterik.
Discussion about this post