GJKKO vendosi dënimin me 2 vite burg për Fredi Belerin, kryebashkiakun e zgjedhur të Himarës. SPAK kishte kërkuar dënimin me 2 vite e 6 muaj burg me akuzën e korrupsionit në zgjedhje, por GJKKO në vendimin e saj ka ulur me 6 muaj kërkesën e Prokurorit të SPAK.
Ndërkohë GJKKO dënoi me 1 vit e 6 muaj burg Pandeli Kokaveshin, i konsideruar si bashkëpunëtor i Belerit. Por Kokaveshit i konvertohet dënimi me 3 vjet shërbim prove.
Avokati mbrojtës i Fredi Belerit, në një deklaratë për mediat, në përfundim të seancës, u shpreh se vendimi ishte politik. Sipas tij, porositës i këtij vendimi ishte kryeministri Edi Rama.
“Ju e dëgjuat diskutimin përfundimtar të Fredi Belerit. Gjyqtari e ndërpreu diskutimin e Blerit, për të transmetuar tensionin që ishte jashtë këtij procesi. Ju e patë si bërtiste, si i ndërpreu fjalën Belerit. Ishte vendim politik, sikurse e porositi kryeministri. Aktet proceduriale janë të gjitha të falsifikuara. Beleri u ndoq për katër ditë, pa vendim prokurorie”, tha avokati.
Para se të shpallej vendimi, kryebashkiaku i Himarës lexoi deklaratën përfundimtare, ku pretendoi se ishte nën presion nga togat e zeza. Sipas Belerit, provat dhe faktet kundër tij, nuk janë verifikuar.
“Prokurori kërciste stilolapsin në tavolinë gjatë gjyqit, ky është presion. Ky hetim dhe këto akuza janë sajesa qesharake. Këto konkluzione nuk mund të merren parasysh, dosja nuk ka fakte ndaj nuk kam kërkuar gjykim të shkurtuar. Të gjitha gjetjet e Prokurorisë kundërshtohen nga avokatët e mi. Herët a vonë, e vërteta do dalë një ditë. Jam përgjuar 24 orë në ditë, provat nuk përputhen. Në të njëjtën kohë që thuhet se Arseni ka folur me mua, ai ishte në komisariatin e Vlorës. Prokuroria duhet të verifikonte faktet. Gjykata e Apelit pranoi të gjitha kërkesat e prokurorisë dhe asnjë kërkesë timen. Një ndër to t’i kërkonte informacion gjykatës së Vlorës. Kjo është një çështje politike, me mua u shkelën të gjitha parimet edhe prezumimi i pafajësisë. U tejkaluan kompetencat. Kërkesa e prokurorisë për 2.6 vjet burg nuk ka asnjë logjikë. Për dy kryetarë bashkie ka kërkuar shërbim prove. Sa herë të ketë zgjedhje rezultati do jetë i njëjtë, himarjotët nuk janë budallenj. Është e padrejtë që kësaj çështjeje t’i jepet kuptim patriotik. Jam besimplotë nuk e ndjej veten fajtor. Herët a vonë do gjej drejtësi. Sot duhet t’i thoni jo presionit të pushtetit, të tjerët janë kalimtarë dhe besnikë të partisë. Dy prokurorët do t’i gjykojë historia”, tha Beleri.
Seanca u ndoq nga përfaqësues të ambasadës greke si dhe mbështetës të tij nga Himara. Këta të fundit kanë reaguar duke thirrur në seancë “Turp, Turp”, pasi GJKKO shpalli vendimin.
I pranishëm ishte edhe kreu i PBDNJ-së, Vangjel Dule.
Kandidati i koalicionit “Bashkë Fitojmë” për bashkinë e Himarës Fredi Beleri u arrestua më 12 maj. Prokuroria e akuzoi se kishte ofruar para për të blerë 8 vota në shifrën e 40 mijë lekëve.
Discussion about this post