Gjykata e Fierit ka pranuar kërkesën e Alfred Belerit për lirimin me kusht.
Kjo ishte seanca e katërt në Gjykatën e Fierit për shqyrtimin e kësaj kërkese nga ana e Fredi Belerit. Me këtë vendim, Beleri fiton lirinë 1 muaj e gjysmë përpara, nga koha e mbetur për vuajtjen e dënimit.
Pas vendimit, avokati i Belerit, Geni Gjyzari ka dhënë një prononcim të shkurtër për mediat, duke ironizuar togat e zeza. Sipas tij, Beleri u lirua tani pasi u mbajt në qeli për zgjedhjet e pjesshme në Himarë, me urdhër të kryeministrit Edi Rama.
“Respekte për gjykatën, vendosi lirimin para kohe me kusht. Edhe 6 javë i kishin mbetur për të qëndruar në burg. U lirua sot. E shikojmë se ai pronari që ka çelësat e burgut dhe të kujtdo dha leje tani pas zgjedhjeve që të dalë nga burgu”, tha avokati.
Akuza ndaj Ramës hodhi edhe vëllai i Belerit në një prononcim për mediat greke. “Sigurisht që drejtësia do të jetë kur ai të shfajësohet nga gjykatat europiane ku do të vërtetohet pafajësia e tij. Plani që u krijua nga regjimi i Ramës me të vetmin synim për të kapur bashkinë e Himarës ishte shumë i dukshëm”, tha ai.
Alfred Beleri, i cili tashmë mban mandatin e eurodeputetit, u dënua me vendim të formës së prerë me 2 vite burg për korrupsion aktiv në zgjedhjet e 14 Majit 2023. Beleri nuk i pranoi asnjëherë akuzat duke i quajtur politike e të urdhëruara nga kryeministri dhe kundërshtari i tij politik, Edi Rama.
Lexo edhe:
Beleri pas lirimit: Demokracia në Shqipëri nuk funksionon, lufta ime fillon tani
Discussion about this post