Kryetari i Bashkisë Librazhd, Mariglen Disha, valëvit “Flamujt e kuq” mbi tenderat me abuzime, sidomos për fondet e rrugëve rurale. Kur ishte në fushatën e zgjedhjeve kryetari ka premtuar t’i rregullojë këto rrugë, por shkeljet që bëhen gjatë prokurimeve lënë pak shpresë se do të bëhet punë në afat dhe me cilësi.
Një projekt i tillë është tenderi që ka firmosur Disha së fundmi. Bëhet fjalë për prokurimin me objekt “Rikonstruksion i rrugëve rurale dhe veprave te artit te Bashkisë Librazhd ”. Sqarojmë se bëhet fjalë për 10 rrugë të shkurtra në disa fshatra, ku të gjitha së bashku janë vetëm 718 metra linear, ose 0.7 km.
Pra janë rrugica të fshatrave ku sipas preventivit, do të bëhen gërmime për të sheshuar rrugën dhe më pas do t’u hidhet 4 centimetra asfalt. Dhe, për këto punime që do të zgjasin vetëm 28 ditë, Disa ka vënë në dispozicion 99 milionë lekë. Shikojeni gjendjen e rrugës dhe imagjinoni nëse rregullimi i saj mund të bëhet në këtë afat të shkurtër.
E mbi të gjitha këto para po jepen në shkelje të ligjit, sepse tenderi është mbyllur pa garë. Për dy javë kohë që ishin lënë në dispozicion, vetëm bashkimi i operatorëve ”Grein-T“ sh.p.k – Viante Konstruction dorëzoi një ofertë me vlerë 95 milionë lekë, sa 98% e fondit limit.
Në këto kushte, ku kemi mungesë konkurrence dhe një ofertë të shtrenjtë, ligji kërkon që procedura të anulohet. Këtë rregull nuk e ka qejf Mariglen Disha, sepse i prish planet e tij. Kështu procedura është mbyllur pa garë dhe i është dhuruar kontrata firmave ”Grein-T“ sh.p.k – Viante Konstruction.
Për këtë shkelje të hapur të ligjit, Open Data Albania ka ngritur alarmin duke i vendosur ‘Flamurin e Kuq’. Kujtojmë se kjo është shenja e riskut të korrupsionit në këtë tender.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post