Infrastruktura në bashkitë e Përrenjasit dhe Librazhdit është një problem i cili nuk po gjen zgjidhje. U fol se mandati i tretë i “Rilindjes” do të ishte i fokusuar në zonat rurale apo fshatrat, por duket se asgjë e tillë nuk është bërë as në qytet.
Situatën në të cilën ndodhen rrugë te qarkut të Elbasanit janë denoncuar nga ana e deputetit demokrat Lefter Gështenja. Ai ka publikuar disa foto të rrugëve, për të treguar përditshmërinë që përballen banorët e këtyre zonave. Sipas tij kemi të bëjmë me një keqqeverisje e cila ka lënë harresë qytetarët që e kanë votuar.
Në fotot e postuara nga Gështenja, janë disa fshatra të cilat përmbyten menjëherë nga reshjet e shiut. Balta gjithashtu shkaktohet duke i bërë ato të pakalueshme.
”Nuk do rresht së denoncuari këtë pushtet abuzues, duke dhënë alternativën tonë për një qeverisje të drejtë dhe me mundësi për të gjithë shqiptarët.
Qarku i Elbasanit, në mënyrë të veçantë Bashkia Librazhd dhe Përrenjas kanë me qindra km rrugë rurale që kanë nevojë për ndërtim dhe mirëmbajtje.
Mungesa e investimeve nga pushteti vendor dhe qendror është fakt, është e prekshme.
Ndërsa dimri po afron, situata e rrugëve në të gjithë zonën është dramatike.
Vëzhgoni fotot nga fshatrat që vizitova këto ditë.
Pamjet flasin vetë. Kjo është një arsye përse kërkohet një Reformë e thellë Territoriale”, shkruan deputeti në postimin e tij.
