Fshati Shtrezë në Shishtavec të Kukësit prej disa ditësh është izoluar nga reshjet e dendura të borës. Dimri është i ashpër me temperatura deri në disa gradë nën zero.
Shoferi i linjës Shtrezë-Kukës tregon se prej një jave nuk kanë lëvizur. Të sëmurët i transportojnë në krah duke çarë me vështirësi borën që shkon deri në 40 centimetra trashësi.
“Ka një javë që nuk kemi lëvizur, fadroma këtej s’ka ardhur. Jemi 20 familje të bllokuara. Të sëmurët i kemi transportuar në krah. Ka pasur ditë që s’ka pas energji, por edhe ka”, thotë shoferi i linjës Shtrezë-Kukës.
Nga ana tjetër qytetarët kërkojnë që bashkia të çojë fadromat për të hapur rrugën prej 1 km që lidh fshatin e tyre me aksin nacional Kukës-Shishtavec.
Gjithashtu po kaq e vështirë është jetesa gjatë dimrit edhe për banorët e fshatit Topojan. Një i moshuar shprehet se problemi më i madh është shkollimi i fëmijëve.
“Borë prej 4 muajsh pa ndërprerë, kërkojmë ndihmën e pushtetit qendror që në këtë rrugë të vihet dorë. 10 mësues nga Kukësi shkojnë të japin mësim në Topojan. Kemi vështirësi. Bazën ushqimore e sigurojmë dhe e ruajmë nga vera”, thotë ai.
Së fundmi është bërë më dije se akset nacionale janë të kalueshme në qytetin e Kukësit, përfshirë dhe Rrugën e Kombit, por problem mbeten rrugët në fshatrat malorë të Shishtavecit dhe Arrënit.
Discussion about this post