Fshehën 3 kg kokainë në motorin e makinës, arrestohen dy shqiptarë në Itali

Dy shqiptarë, 24 dhe 28 vjeç, u arrestuan në provincën e L’Aquila të Italisë pasi u kapën me drogë.

Dy të rinjtë kishin fshehur një sasi droge prej tre kilogramë kokainë në pjesën e motorit të makinës.

Media italiane raportoi se prej disa ditësh karabinierët ishin në gjurmët e dy të arrestuarve, të dyshuar për trafik droge dhe sasia e kapur e kalon shifrën e 100 mijë eurove në treg.

Ndërhyrja nisi në orën 18:00 të mbrëmjes së enjte, teksa mjeti me të cilin lëviznin të dyshuarit u ndalua për kontroll në postbllokun e organizuar të Guidonia, jashtë Romës.

“Pas shumë vështirësish, nga mbulesa e makinës dolën tre kilogramë kokainë, të fshehura nën këllëfin që mbulon kalimin e kanaleve të ajrit dhe sistemin elektrik. Krahas drogës, u sekuestrua edhe shuma e parave të gatshme prej rreth 50 mijë eurove, e gjetur tek shqiptarët”, shkruajnë mediat.

Të dyshuarit u arrestuan për ‘posedim të lëndës narkotike të llojit kokainë me qëllim tregtimin’. Dy të arrestuarit u transferuan në burgun e Romës “Rebibbia”, në pritje të procesit hetimor.