Pas akuzave të sotme pasi dyshohet se ka shkelur ligjin e dekriminalizimit, ku thuhet se ajo ka fshehur ndryshimin e emrit të babait të saj nga David Hoti, në Artan Hoti, ka reaguar deputetja e PD, Elda Hoti. Me anë të një postimi në facebook, deputetja Hoti shprehet se që kur ka hyrë në politikë janë munguar shumë që ta sulmojnë, pasi sipas saj kanë frikë nga mbështetja e madhe që po i japin njerezit.
“Janë “munduar” shumë të më sulmojnë, që më hyrjen time në politikë.
Kam vendosur të jap kontributin tim në politikë, për zonën që unë përfaqësoj, pa kërkuar vende fituese, siç kanë qenë bërë shumica e këtyre, që sot janë të “pakënaqur”. Madje duke marrë sulme, nga më të ndryshmet nga to. Thjeshtë se kishin frikën e mbështetjes së madhe, që do të më jepnin njerëzit” – shprehet Hoti.
Në lidhje me akuzat, Hoti mohon të ketë ndryshuar gjeneralitetet dhe të ketë fshehur diçka, ndërsa i drejtohet ankuesit Llesh Nikolli si një komunist.
“I përshëndes dhe ju them e keni të kotë, nuk e njollosni dot figurën time. Zotit Llesh, që këto e paskan gjet, për ta nxjerrë firmëtar, i them ta kanë dhënë informacionin gabim. Unë nuk kam ndryshuar kurrë gjeneralitete, as nuk kam fshehur, se nuk kam asgjë, për të fshehur. Kam respektuar me përpikmëri ligjin për dekriminalizimin dhe jam në politikë, për të mbështetur dekriminalizimin e mëtejshëm të politikës. Nuk kam pranuar në asnjë moment të jetës time, as të korruptohem, as nuk kam marrë ndonjë tender.
As nuk kam qenë ndonjëherë në pushtet që të abuzoj. Kam hyrë në politikë jo për të pasuruar veten, as familjaret e mi, as për te punësuar të afërmit e mi, ashtu siç kanë bërë këta që fshihen pas Zotit Llesh! Unë vij nga familje e të përndjekurish politik. Sot, nuk do të lejoi askënd të mundohet të më bëj të ndihem e “persekutuar”. Nuk kam bërë ndonjë krim, që të më bëhet gjyq publik, as politik. Babai im, ka pasur një jetë plot sfida dhe kurrë nuk u dorëzua. Unë jam bija e tij, që kurrë nuk do dorëzohem ndaj askujt dhe gjithë jetën time do mundohem ta bëj krenar, ashtu siç jam unë për të” – është shrehur deputetja Hoti.
Kujtojmë se deputetja Elda Hoti dyshohet se ka shkelur ligjin për dekriminalizimin, pasi ka fshehur ndryshimin e gjeneraliteteve të të atit. Hoti u zgjodh deputete për qarkun e Lezhës. Në KQZ është depozituar një ankesë, ku thuhet se Hoti ka fshehur ndryshimin e emrit të babait të saj nga David Hoti, në Artan Hoti. Shkresa në fjalë, mban firmën e ankuesit i cili është Llesh Nikolli.
