Federata Shqiptare e Sportit Universitar (FSHSU), si anëtare me të drejta të plota në Komitetin Olimpik Kombëtar Shqiptar (KOKSH), ka deklaruar se do të bojkotojë Asamblenë e 31-të të Përgjithshme të këtij institucioni, e parashikuar të mbahet më 23 prill 2025.
Në një deklaratë zyrtare, FSHSU ka shprehur mbështetje të plotë ndaj vendimit të Federatës Shqiptare të Futbollit (FSHF) për të mos marrë pjesë në Asamble, duke denoncuar si të padrejtë vendimin e KOKSH për të refuzuar përfshirjen në rendin e ditës të një kërkese zyrtare të FSHF-së. Kërkesa kishte të bënte me zbatimin e vendimit përfundimtar të Gjykatës së Arbitrazhit për Sportin (CAS), i cili ka shpallur të pavlefshme një sërë procesesh të mëparshme brenda KOKSH.
FSHSU e konsideron të papranueshëm faktin që në vend të shqyrtimit të kësaj çështjeje me rëndësi institucionale, në rendin e ditës është përfshirë një “monolog i paralajmëruar i Presidentit të shkarkuar të KOKSH”, duke përjashtuar debatin dhe shprehjen e zërit të anëtarëve.
“Refuzimi për të dëgjuar një anëtar të barabartë dhe për të trajtuar një vendim të Gjykatës së Arbitrazhit për Sportin përbën një shkelje të parimeve demokratike dhe të frymës olimpike,” thuhet në deklaratë. Sipas FSHSU-së, ky veprim bie ndesh me Kartën Olimpike, Kartën Evropiane të Sportit dhe çdo standard të mirëqeverisjes në sport.
Në reagimin e saj, FSHSU ngre shqetësimin se po minohet funksionimi i KOKSH përmes një drejtimi të “pa transparencë dhe përjashtues”, duke theksuar se kjo qasje po dëmton besimin midis anëtarëve dhe legjitimitetin e vendimmarrjes.
“Nëse federata më e madhe sportive në vend, siç është FSHF, nuk lejohet të shprehë zërin e saj, atëherë cila është garancia për lirinë e fjalës dhe përfaqësimin e anëtarëve të tjerë?”, thuhet më tej në deklaratë.
Në përfundim, FSHSU rithekson angazhimin e saj ndaj parimeve të ligjshmërisë, transparencës, kontrollit dhe balancave, si dhe përfaqësimit të barabartë – vlera që sipas saj duhet të jenë gurë themeltarë për ndërtimin e një sistemi sportiv të drejtë dhe demokratik në Shqipëri.
Discussion about this post