Tashmë jemi në pikun e sezonit turistik dhe supozohet që vendet që vizitohen nga turistët e huaj të ishin bërë gati për mirëpritje që në fillim të këtij vitit. Por, në vendin tonë ndodhin çudira, pasi punimet bëhen në mes të sezonit, kur të gjitha vendet historike janë plotë me turistë, të cilëve duhet t’ia kursejmë pamje më ndërtime dhe rrëmuja. Fondit Shqiptar të zhvillimit duket se nuk i bën përshtypje fakti që burimet tona turistike asnjëherë nuk janë gati për sezon, por vazhdojnë punimet me turistët rreth e rrotull, pasi më shumë rëndësi kanë paratë që do fitojë përmes tenderëve korruptive. Kështu brenda një dite FSH ka shpallur dy tenderë që kapin vlerat 11 miliardë lekë. Njëri prej tyre është kontratë me objekt “Ndërhyrje ne zona historike për forcimin e potecialitturistik, kala, ura, qendra historike, pazare, fasada, etj (rajoni 3 dhe 4) dhe Rijetëzimi dhe përmirësimi i vlerave të Kalasë së Tepelenës”, për të cilën është lënë në dispozicion fondi limit me vlerë 541,666,666 lekë të reja, ose 6 miliardë lekë të vjetra.
Pikërisht në zonat e Tepelenës, Këlcyrës, Sarandës dhe Gjirokastrës ku pritet të bëhen këto punime, ka shumë turistë të huaj gjatë sezonit të verës. Dhe sipas dokumentit punimet mund të nisin vetëm pas 25 prillit, ku parashikohet të shpallet fituesi i tenderit, çka do të thotë se muaji kusht ku është vala e larta edhe nga turistët vendas në këto zona do të ketë rrëmujë më llac, makina, pluhur dhe zhurmë. Në këto raste mbetet vetëm të shpresojmë që ministria e Turizmit Eva Margariti të reagojë, minimumi që mund të bëjë pas faktit që para sezonit “ngroheshin në diell” dhe nuk bënin asnjë investim.
5 miliardë lekë për zonat rurale
Shqipëria ka mjaft vende rurale që pëlqehen dhe vizitohen shumë nga turistët qoftë në turizëm veror edhe për turizëm dimëror. Por, FSHZH ka vendosur të ndërhyjë edhe në këto zona. Tenderi i dytë me vlerë 466 666 666,6 lekë është hapur me objekt “Rigjenerimi Urban në zona periferike dhe turistike dhe në fshatra me popullsi të dendur”. Edhe në këtë rast punimet pritet të fillojnë pas 20 korrikut dhe do të vazhdojnë deri në fund të vitit, por edhe më pas.
Nuk dimë nëse këto institucione paguhen me taksat tona për të investuar si duet dhe në sezone të marrim përfitime nga këto shpenzime, apo për të derdhur para pa kriter?
Një pjesë të përgjigjes e japin faktet e mësipërme, ndërsa për më shumë duhet të jetë Ministria e Infrastrukturës ajo të jap shpjegim se pse shkelet ligji për mos cenim të vendeve turistike gjatë kohës së sezonit. Pasi prej vitesh, janë kthyer në traditë punimet gjatë sezonit turistikë, kur ekspertët sugjerojnë të kundërtën, pasi këto punime dëmtojnë edhe bizneset, të cilët vetë fillojë përgatitjet për sezon që në muajin maj.
Discussion about this post