Partia Demokratike ka reaguar pas takimit që kryeministri Edi Rama zhvilloi mëngjesin e sotëm me deputetët e rinj të PS.
Nëpërmjet një njoftimi për mediat, PD e konsideron Ramën si autor të masakrës elektorale, duke refuzuar kështu edhe ftesën e kryeministrit për bashkëpunim për të zgjedhur presidentin e ri.
“Edi Rama është autori i masakrës elektorale dhe tjetërsimit të vullnetit të shqiptarëve për ndryshim. Me qëllim që të largojë vëmendjen ai vazhdon gënjeshtrat, manipulimet dhe diversionet. Vjedhja e zgjedhjeve nga Rama-Doshi-Rakipi e çuan vendin tonë drejt një masakre masive elektorale, ku viktimat janë qytetarët shqiptarë dhe e ardhmja e tyre. Detyra jonë ndaj shqiptarëve është të qëndrojmë të vendosur dhe të luftojmë fort për kthimin e demokracisë në vend. Asnjë diversion nuk do të na ndalë në këtë betejë, duke filluar me shpalosjen e fakteve, provave dhe të dhënave që dëshmojnë pëmasën e plotë të masakrës zgjedhore nga regjimi Rama-Doshi-Rakipi,” njofton PD.
