Fuga sfidon Gjinushin për kryetar në Akademinë e Shkencave

Akademiku Artan Fuga ka konfirmuar se do të kandidojë për kryetarin e Akademisë së Shkencave.

Në një reagim në ‘Facebook’, Fuga iu është përgjigjur interesit që lidhet mbi këtë çështje, ndërsa shton se është përpjekur për një model tjetër pa asnjë interes personal.

Reagimi i Fugës

Po, do të kandidoj!

Miq, gazetarë, dashamirës më kanë pyetur shpesh: Përse nuk kandidon për vendin e kryetarit të Akademisë të shkencave të Republikës të Shqipërisë?

Deri tani nuk u jam pergjigjur, për mirësjellje por edhe sepse as më parë nuk e kam pasur fare, po fare, si objektiv.

Jam përpjektur për një model tjetër pa asnjë interes personal!

Por, aktualisht them se ende është shpejt për kandidime të zyrtarizuara.

Ndërkaq për këto tre objektiva që kurrë nuk i braktis:

1- Për të rrezistuar kundër sipërmarrjes të papërgjegjshme dhe politikisht amorale të ndonjë deputeti të përdorur e konsumuar, prej vitesh, që kërkon shtyrë nga lobi të ndryshme të ndryshojë ligjin për akademinë duke i bërë drejtuesit e saj të përjetshëm, pa e kufizuar më me një mandat detyrën e tyre, edhe pas të 75 – vjetëve,

2- Për të vazhduar të promovoj modelin tim për një akademi shkencash të vërtetë, sipas modeleve perëndimore pa përjashtim, jo të kthyer në një institut kërkimesh pa aks e pa bosht, që duplikon Institute të tjera duke shpërdorur kështu paranë publike,

3- Për të treguar dështimet e modelit të tanishëm të imponuar me dhunë nga një grusht deputetësh që sot nuk dihet se ku janë, të imponuar nga politika,

po, për këto tre objektiva nuk përjashtoj fare kandidimin!

Dhe sot, edhe pse ndoshta është ende herët për ta konsideruar vendim të pakthyeshëm, kam bindjen se do ta bëj!

Akademia e Shkencave drejtohet aktualisht nga Skënder Gjinushi, i cili u shpall kryetar i Akademisë së Shkencave pas zgjedhjeve që u kryen më 24 maj 2019. Gjinushi mori 35 vota pro dhe 6 kundër, ndërsa këtë vit i mbaron mandati. Ish-kryetari i Partisë Socialdemokrate ishte kandidati i vetëm për kryetar në zgjedhjet për Akademinë e Shkencave. Për herë të parë pas ndryshimeve ligjore të 2008-s në këto zgjedhje votoi edhe shkrimtari i njohur Ismail Kadare, përmes postës elektronike. Ndërsa akademiku Artan Fuga nuk ishte i pranishëm, duke u shprehur se zgjedhjet ishin në kundërshtim të plotë me rregulloren që parashikonte akademia.