Sezoni veror është duke përfunduar ndërsa prej 20 gushtit ka nisur largimi i të gjithë pushuesve dhe emigrantëve që destinacion kanë patur vendin tonë. Por ajo ç’ka vihet re është se krahasuar me një vit më parë ka pasur një fluks më të lartë, kjo për shkak se vjet masat ishin më strikte për shkak të koronavirusit. Gushtin e 2020- ës kanë dalë nga porti detar i Vlorës rreth 6000 udhëtarë, ndërsa këtë sezon rreth 26000 mijë. Sakaq, nga shifrat gushti i këtij viti krahasohet me atë të vitit 2019, por me një diferencë prej 2000 udhëtarësh më pak këtë vit.
“Ka filluar rikthimi i pasagjerëve, intensiteti më i madh ka qenë këto 10 ditët e fundit nga data 20 gusht deri më sot. Por për ta krahasuar me këtë periudhë të vitit jemi komplet në një situatë tjetër. Gjithë gushti i vitit të kaluar kanë dalë rreth 6000 veta nga Porti i Vlorës”, ka deklaruar Festim Skëndaj.
Ndërsa, sa i takon dy muajve qershor e korrik, mund të them se shifrat janë të ulëta për shkak të masave. Gjatë gushtit në portin detar të Vlorës kanë funksionuar 3 tragete, kjo për të përballuar fluksin e lartë. Krahas linjës Vlorë-Brindisi, u vendos dhe ajo me Barin, ku tragetet niseshin çdo ditë. Sipas Skëndajt, ka pasur edhe vonesa, por kjo sigurisht për shkak të fluksit. Sipas tij tragetet janë nisur çdo ditë, në mënyrë për të shmangur radhët e mëdha.
