Fundoset varka me emigrantë në Kanalin Anglez, të paktën një i vdekur

Një person u mbyt dhe pesë janë në gjendje të rëndë pasi një varkë me emigrantë u mbyt në Kanalin anglez sot, thanë autoritetet lokale franceze.

Kërkimet për viktima të tjera të mundshme vazhduan në brigjet e Sangat (Pas-de-Calais), me mobilizimin e anijeve franceze dhe britanike si dhe një helikopter.

Rreth 50 pasagjerë në bord u shpëtuan.

Anija u pikas duke u fundosur ditën e sotme, herët në mëngjes nga anija patrulluese franceze Cormoran, e cila nisi menjëherë një operacion shpëtimi.

Prokuroria publike e Boulonjës ka nisur hetimet për aksidentin.

Që nga viti 2018, më shumë se 100,000 emigrantë kanë kaluar Kanalin Anglez, duke përdorur varka të vogla, megjithë qëndrimin e ashpër të qeverisë konservatore britanike kundër emigracionit të paligjshëm, me pengesat në politikën e qeverisë për këtë çështje në rritje.

Sipas një raporti të AFP-së, 100.715 emigrantë kanë kaluar që kur Mbretëria e Bashkuar filloi të numëronte këto kalime në 2018, të cilat janë kryesisht nga brigjet franceze.

Të enjten, 755 emigrantë kaluan detin e rrezikshëm drejt brigjeve britanike – një numër rekord ditor që nga fillimi i vitit – tha Zyra e Brendshme Britanike.

Një nga ngushticat më të ngarkuara në botë, Kanali anglez shpesh është skena e mbytjeve të anijeve të vogla të mbushura me emigrantë.

Njëzet e shtatë persona humbën jetën në nëntor 2021. Dje u shpëtuan 17 emigrantë, njoftoi Ministria e Brendshme.

Për shkak të kushteve të favorshme atmosferike që mbizotërojnë në zonë ditët e fundit, numri i varkave me emigrantë që tentojnë të kalojnë është në rritje.