Policia greke ka goditur një organizatë kriminale që vepronte në ishullin e Kretës, e cila dyshohet se importonte në mënyrë të paligjshme municione luftarake nga Shqipëria. Gjatë operacionit u arrestuan katër anëtarë të grupit dhe një person tjetër që ndihmonte aktivitetin e tyre.
Pas hetimeve, autoritetet helene mundën të vërtetojnë aktivitetin e trafikantëve dhe kryen operacionin për kapjen e tyre, Manolis Janulis, Nikolas Lagudhaqis, Jorgos Karcionaqis, Manushos Pisadhaqis dhe shtetasi shqiptar Kostika Braho.
Sipas Protothema, hetimet zbuluan se që prej prillit 2025, anëtarët e kësaj organizate kishin bashkëpunuar me një rrjet tjetër kriminal me qëllim trafikimin e sasive të mëdha fishekësh drejt Kretës, për t’i shitur më pas në tregun ilegal, kundrejt fitimeve të konsiderueshme.
Rrjeti funksiononte në mënyrë të mirëorganizuar: porositë për municione mblidheshin në Greqi, dhe më pas sigurimi i tyre kryhej nga një furnizues i paidentifikuar në Shqipëri. Transporti realizohej nëpërmjet rrugës tokësore dhe detare, përmes dy automjeteve, ku njëri prej tyre ishte një kamion i modifikuar enkas për fshehjen e municioneve.
Në automjetin e përdorur prej trafikantëve u gjetën të fshehura 24.126 fishekë të kalibrave të ndryshëm,një pushkë gjermane, një automjet dhe një motoçikletë.
Policia greke ka zbardhur edhe rolet e secilit anëtar të organizatës:
- 65-vjeçari, organizatori kryesor, merrej me mbledhjen e porosive dhe pagesave për municionet, udhëtonte drejt kufirit dhe më pas organizonte shitjen në Kretë, duke i shpërndarë vetë me motoçikletë.
- 72-vjeçari kishte ndërtuar një vend të fshehtë brenda kamionit dhe shërbente si shofer shoqërues i organizatorit deri në kufi.
- 73-vjeçari ishte shoferi i kamionit që bënte transportin deri në kufi dhe më pas kthehej në Kretë.
- 41-vjeçari, shtetas shqiptar, siguronte municionet në Shqipëri nga një bashkëkombës furnizues dhe i dorëzonte ato pjesëtarëve të organizatës për transport drejt Greqisë.
Discussion about this post