Furnizonin me armë grupet kriminale, zbulohet baza në Shkallnur

Policia ka zbuluar një tjetër bazë që shërbente për furnizimin me armë dhe municion të grupeve kriminale.

Baza me armë u zbulua në fshatin Shkallnur të Durrësit, ndërsa u vendosën në pranga 2 të rinj.

20-vjeçari Hekuran Troplini dhe 19 vjeçari Emiljano Pasho, raportohet se u kapën nga uniformat blu në flagrancë duke shitur armë.

Ndërkohë policia gjeti dhe sekuestroi 4 armë zjarri kallashnikovë me 20 krehra, qindra fishekë luftarak, 1 motomjet që shërbente për të lëvizur dhe transportuar armët e municionin, me qëllim shitjen, 63 700 lekë dhe një sasi lënde narkotike e dyshuar cannabis sativa.

Dy të rinjtë dyshohet se në bashkëpunim me shtetas të tjerë, gjatë muajve të fundit, kanë shitur sasi armatimi dhe municioni luftarak.

Ndërsa po punohet për identifikimin dhe kapjen e personave të tjerë të përfshirë në këtë veprimtari kriminale.