Nga Arian Galdini
A nuk ju bën përshtypje se që prej ditës kur Edi Rama ka marrë kreun e PS-së, ai ka shpalosur zgjedhje pas zgjedhjesh një strategji diabolike të asgjësimit të zgjedhjeve????
Në vitin 2007, ai pothuajse i sabotoi, por arriti vetëm t’i vononte me shkak “certifikatat”. Në vitin 2008 bindi Sali Berishën e pas Gërdecit që së bashku t’i hidhnin në erë zgjedhjet me Kodin Elektoral e madje edhe me vetë ndryshimet kushtetuese.
Në vitin 2009, zgjedhjet përfunduan në panair votash e në thelb u kthyen në votime listash kryetarokratike. Në vitin 2013, Edi Rama, për të fituar pushtetin, bëri ‘Pakt me Djallin’ dhe mbaroi punë disa muaj para zgjedhjeve, ndërsa firmosi koalicionin matematik me Ilir Metën. E sikur mos t’i mjaftonte fitorja matematike në tavolinë, ai futi në listat e tij edhe gjithë llumin e shoqërisë, nga të fortët, cubat, horrat, tutorët e deri te “të përzgjedhurit” e grupeve kriminale dhe oligarkike.
Me Ilir Metën mori pushtetin, me pushtetin gërreu Ilir Metën. Në vitin 2015, hyri si i forti i sapokurorëzuar. Në vitin 2017, nuk ia mbajti të bënte zgjedhje, ndaj edhe çoi Ilir Metën në Presidencë e Lulzim Bashën nxori nga çadra e lirisë për t’i ofruar marrëveshjen e 17-18 majit… As në 2017 nuk bëri zgjedhje. I kreu zgjedhjet në tryezën e 17 majit… Më tej, në vitin 2019, ia doli me apo pa marrëveshje, ta përzërë opozitën nga zgjedhjet e gëlltiti krejt qyl 61 bashki, me vetëm 6% të qytetarëve pjesëmarrës në votime.
Në vitin 2021, nuk i duhej më Ilir Meta se kishte 61 bashki, e megjithatë, si urrejtar i zgjedhjeve, ai nuk mund të mos përdorte paktet me botën e krimit, oligarkët si edhe ushtrinë e patronazistëve (unë nuk i quaj ata patronazhistë, por patronazistë)… E ja ku jemi sot, ka vetëm pak ditë që ka nisur fushata elektorale për zgjedhjet lokale të 14 majit 2023. Edi Rama e nis me mbjellje pemësh e madje thumbon Erion Veliajn duke i thënë se ai ka fat pasi atë e duan edhe kundërshtarët…
Në të vërtetë, Edi Rama e di shumë mirë se edhe ai vetë ka që në vitin 2013 që fiton pa zgjedhje, pa kundërshtarë dhe pa asnjë garë a përballje reale. Pikërisht ky është edhe thelbi i gjithçkaje, për të cilën po shkruaj këtë reflektim… Sipas meje, ne kemi filluar fushatën elektorale për 14 majin, por në fakt as kësaj radhe nuk ka zgjedhje… Edi Rama ka përballë një opozitë pa vulë, një opozitë me vulë dhe disa parti e kandidatë “rishtarë” që nuk janë as në gjendje e as në ngasje për ndonjë shkëndijëz gare.
Me opozitat me dhe pa vulë ka bërë Kodin Elektoral, me Kodin ka mbytur, vrarë e shkalafitur çdo alternativë, mundësi, parti të re apo kandidat të ri, me vulën kafshon e nervozon pavulsat, me pavulsat ua tredh vulën atyre me vendim Gjykate, e kështu vetë del me lopatë në dorë dhe e bën majin muaj dhjetori duke pyllëzuar çdo detaj elektoral. Shkurt e qartë, në 14 maj nuk ka zgjedhje, ka votime me “polici pyjore”…
Ndaj si kryetar i LRE Lëvizja e Re, pra, si Kryetar i një partie të re, të djathtë dhe opozitare, unë u bëj thirrje të gjitha partive, politikanëve, personaliteteve, flukseve të djathta dhe opozitare, që të nisim që sot të mendojmë për përtej 14 majit. Po nuk reflektuam e po nuk u ulëm së bashku të gjejmë zgjidhje vlerore e parimore, druaj se nëse votimet e 14 majit do t’i akaparojë “policia pyjore”, votimet e 2025 do t’i mbyllë ca muaj para kohe Dashëndyshja e Kadastrës… Prioriteti i prioriteteve për opozitën duhet të jetë rikthimi i zgjedhjeve… Po nuk rikthyem zgjedhjet, atëherë e kemi të kotë sepse votimet do nxjerrin gjithmonë fitues Edi Ramën…
Të rikthejmë zgjedhjet. Reforma Zgjedhore dhe rikthimi i zgjedhjeve janë e vetmja mundësi që në Shqipëri të vendosin shqiptarët për ndryshimin… Nëse ne si opozitë nuk do të rikthejmë zgjedhjet, më vjen keq, por nuk do të kemi absolutisht asnjë gjasë të dalim jashtë qosheve ku secili që lëviz nga kuadrati ynë të na duket si lojtar i Ramës… Pa zgjedhje ne më shumë do bëjmë “loja luftash” kundër njëri-tjetrit, sesa do të guxojmë shanset për fitore.
Discussion about this post