Pesë të rinj kanë rënë në pranga ditën e sotme në Tiranë, pasi merreshin me falsifikim parash dhe futjen e tyre në treg. Burimet bëjnë me dije se 3 nga të arrestuarit janë të mitur, ata blinin kartëmonedha të falsifikuara nëpërmjet rrjeteve sociale, në bashkëpunim me njëri-tjetrin, dyshohet se i hidhnin në qarkullim nëpër subjekte të ndryshme tregtare, në qytetin e Tiranës.
Gjatë operacionit policia ka sekuestruar sasi të konsiderueshme të kartëmonedhave të prerjes 50 euro, të dyshuara të falsifikuara. Në kuadër të këtij operacioni u arrestuan në flagrancë shtetasit: E. P., 19 vjeç, E. H., 19 vjeç, L. K., 17 vjeç, Xh. Ç., 17 vjeç dhe A. H., 16 vjeç, për veprat penale “Falsifikimi i monedhave”, kryer në bashkëpunim dhe “Mashtrimi”. Sakaq, njoftohet se policia vazhdon hetimet për të zbuluar grupet me të cilët ata bashkëpunonin.
Discussion about this post