Tashmë është zyrtare, Franck Kessie është lojtari më i ri i Al Ahlit. Duket se këmbëngulja e klubit saudit më në fund i dha frytet, teksa operacioni i transferimit të mesfushorit nga Bregu i Fildishtë është mbyllur për shifrën e 12.5 milionë eurove.
Asnjë skuadër nga Premier League dhe Seria A nuk arriti të bënte një ofertë të kënaqshme për Barcelonën, e cila edhe pse donte ta hiqte qafe lojtarin, pasi nuk ishte pjesë e planeve të Çavit, as nuk kishte ndërmend ta lejonte largimin si i lirë.
“FC Barcelona dhe Al-Ahli kanë arritur marrëveshje për transferimin e Franck Kessie për 12.5 milionë euro”, shkruhet ndër të tjera në njoftimin e Barcelonës.
Mesfushori iu bashkua Barcelonës në verën e vitit të kaluar, kur u transferua si futbollist i lirë. Ai ka zhvilluar 43 paraqitje në edicionin debutues për Barçën, duke realizuar 3 gola si dhe duke dhuruar 3 asistime. Në Barcelonë, ai mbahet mend më shumë për golin e shënuar në “El Clasico”, përballë Realit të Madridit.
Në klubin e tij të ri futbollisti nga Bregu i Fildishtë do të fitojë dyfishin e asaj që mori te Barça. Operacioni i kënaq të gjitha palët.
Discussion about this post